इतिहास घडवणाऱ्या पावलांचा अभिमान!
पत्रकार राजुभाई पठाण यांची नात डॉ. मिसबाह शेख अहिल्यानगर जिल्ह्याची पहिली ग्लुकोमा सर्जन!
काही यशोगाथा केवळ वैयक्तिक कर्तृत्वाची नसतात; त्या संपूर्ण समाजासाठी प्रेरणादायी ठरतात. अहिल्यानगर जिल्ह्याच्या इतिहासात अशीच एक सुवर्णाक्षरांनी लिहिली जाणारी नोंद झाली आहे. पत्रकार राजुभाई पठाण यांची नात, डॉ. मिसबाह शेख यांनी अहिल्यानगर जिल्ह्यातील पहिली ‘ग्लुकोमा सर्जन’ बनण्याचा मान पटकावत इतिहास घडविला आहे.
ही केवळ एका डॉक्टरची यशकथा नाही, तर ही आहे संस्कार, मेहनत, जिद्द आणि सेवाभावाची परंपरा पुढे नेणारी कहाणी.
पत्रकार राजुभाई पठाण यांनी आयुष्यभर लेखणीच्या माध्यमातून समाजातील प्रश्न मांडले, अन्यायाविरोधात आवाज उठवला आणि जनतेच्या बाजूने निर्भीड पत्रकारिता केली. त्याच संस्कारांच्या शाळेत वाढलेल्या डॉ. मिसबाह शेख यांनी मात्र शब्दांऐवजी शस्त्रक्रियेच्या माध्यमातून माणसांच्या डोळ्यातील अंधार दूर करण्याचा वसा घेतला.
ग्लुकोमा हा “शांत चोर” म्हणून ओळखला जाणारा आजार. वेळेवर निदान व उपचार न झाल्यास कायमस्वरूपी अंधत्व येऊ शकते. अशा गंभीर आजारावर अत्याधुनिक शस्त्रक्रिया करणारी पहिली तज्ज्ञ डॉक्टर अहिल्यानगर जिल्ह्याला मिळणे ही बाब केवळ वैद्यकीय क्षेत्रासाठीच नव्हे, तर सर्वसामान्य रुग्णांसाठी आशेचा किरण ठरली आहे.
डॉ. मिसबाह शेख यांचा हा प्रवास सहजसाध्य नव्हता. कठोर अभ्यास, सातत्य, उच्च शिक्षण, आधुनिक वैद्यकीय प्रशिक्षण आणि रुग्णसेवेची तळमळ या साऱ्यांची सांगड घालत त्यांनी हे शिखर गाठले.
स्त्री म्हणून, मुस्लिम समाजातील मुलगी म्हणून आणि ग्रामीण भागातून पुढे येत त्यांनी सिद्ध केले की स्वप्नांना मर्यादा नसतात.
आज ज्या अहिल्यानगर जिल्ह्यातील रुग्णांना मोठ्या शहरांकडे धाव घ्यावी लागत होती, त्या जिल्ह्यातच आता ग्लुकोमा सर्जरीसारखी विशेष सेवा उपलब्ध होणार आहे. हा बदल म्हणजे वैद्यकीय क्षेत्रातील एक क्रांतीच म्हणावी लागेल.
आजोबांची लेखणी समाज जागृत करत होती, तर नातीचे हात आता दृष्टी वाचवण्याचे कार्य करत आहेत ही परंपरा केवळ कुटुंबाचा अभिमान नाही, तर संपूर्ण जिल्ह्याचा गौरव आहे.
डॉ. मिसबाह शेख यांचे यश हे हजारो विद्यार्थिनींसाठी प्रेरणास्थान ठरेल. “आपणही करू शकतो” हा आत्मविश्वास त्यांच्या यशातून नव्या पिढीला मिळतो आहे.
अहिल्यानगरच्या वैद्यकीय इतिहासात सुवर्णाक्षरांनी कोरले गेलेले हे नाव डॉ. मिसबाह शेख केवळ एक डॉक्टर नाहीत, तर आशेचा, सेवाभावाचा आणि समाजप्रगतीचा नवा अध्याय आहे.
चौकट—-
डॉ मिसबाह बिलकीस फारुख शेख यशात सर्व प्रथम डॉ बिलकीस फारुख शेख व डॉ फारुख शेख या तिच्या आई वडिलांचा मोलाचा वाटा आहे.त्याच बरोबर डॉ मिसबाह चे मामा डॉ इकबाल जानूभाई पठाण व जामखेड शहराचे प्रसिद्ध डॉ सादेख जानूभाई पठाण यांचा ही महत्व पूर्ण वाटा आहे.त्याच प्रमाणे आजोबा जानूभाई पठाण,पत्रकार राजुभाई पठाण,खान सर,शमा पठाण ,सलमानभाई पठाण,सना पठाण तसेच सर्व पठाण परिवार व सर्व शेख परिवार यांचे मोलाचे आशीर्वाद ,मार्गदर्शन व सहकार्य लाभले आहे,—डॉ मिसबाह बिलकीस फारुख शेख
