अभ्यास ही करा पण पहिले चांगला माणूस बना–कैलास वाघ ( पी आय लोणी पोलीस स्टेशन )
– प्रवरा ग्रामीण शिक्षण संस्थेच्या कोल्हार येथील प्रवरा हायस्कूल या सीबीएसई शाळेत विद्यार्थ्यांसाठी विद्यार्थी सुरक्षा, वाहतुकीचे नियम, विद्यार्थी हक्क आणि कर्तव्य, सामाजिक माध्यमांचे दुष्परिणाम, कृत्रिम बुद्धिमत्तेचा वापर इत्यादी विषयांवर कार्यशाळेचे आयोजन करण्यात आलेले होते. लोणी पोलीस स्टेशनचे पोलीस निरीक्षक कैलास वाघ यांनी मार्गदर्शन केले.विद्यालयाचे प्राचार्य सुधीर मोरे यांनी प्रास्ताविक केले. पीआय कैलास वाघ म्हणाले, विद्यार्थ्यांच्या अंगी शिस्तीबरोबरच कष्ट आणि प्रामाणिकताअसेल तर परमेश्वर देखील आपल्या पाठीशी उभा राहतो. उत्तम गुण मिळवून गुणवत्ता सिद्ध करणे जितके महत्त्वाचे आहे तितकेच महत्त्वाचे समाजामध्ये चांगला माणूस म्हणून ओळख निर्माण करणे महत्त्वाचे असते. आपल्या कार्यातून समाजामध्ये आपली ओळख निर्माण झाली पाहिजे.
विद्यार्थ्यांना आणि पालकांना हेल्मेटचा वापर सक्तीनेकरावा. नवीन वाहतुकीच्या नियमानुसार पायी चालणाऱ्यांनी आपल्या उजव्या बाजूने चालावे. मुलांनी मोटारसायकल सारख्या वाहनांचा वापर करू नये. विद्यार्थ्यांनी समाजामधील विघातक प्रवृत्तींपासून दूर राहावे. कोणत्याही प्रकाच्या गुंडागर्दीमध्ये विद्यार्थ्यांनी सहभागी होऊ नये. पोक्सो सारख्या कायद्याने विद्यार्थ्यांना अमर्याद असे संरक्षण दिलेले आहे. गुड टच बॅड टच या संकल्पना माहिती करून घ्याव्यात. त्या ओळखाव्यात. कोणत्याही अडचणीच्या प्रसंगी शिक्षकांच्या माध्यमातून पोलीस स्टेशनपर्यंत पोहोचावे. समस्या झाकून ठेवल्याने ती वाढते. त्यामुळे कायद्याचे ज्ञान प्राप्त करावे. भारतीय न्यायसंहितेमध्ये विद्यार्थ्यांच्या संरक्षणासाठी विविध नियम बनवण्यात आलेले आहेत. त्या नियमांची सर्वांनी माहिती घ्यावी, असे त्यांनी सांगितले. सूत्रसंचालन संभाजी आव्हाड यांनी केले तर आभार गोविंद तांबे यांनी मानले. कार्यक्रम यशस्वी करण्यासाठी कदीर शेख आणि ललित तक्ते यांनी मेहनत घेतली.
