लोणी खुर्द ग्रामपंचायतीकडून थकीत घरपट्टी व पाणीपट्टीत ५० टक्के सवलत
ग्रामस्थांचा उत्स्फूर्त प्रतिसाद; ग्रामपंचायत कार्यालयात नागरिकांची मोठी गर्दी
लोणी खुर्द (ता. राहाता | जि. अहिल्यानगर):
राज्य शासनाच्या “मुख्यमंत्री समृद्ध पंचायतराज अभियान” अंतर्गत लोणी खुर्द ग्रामपंचायतीने थकित घरपट्टी व पाणीपट्टीवर ५० टक्के सवलत जाहीर केली असून, या लोकहितकारी निर्णयाला ग्रामस्थांकडून मोठ्या प्रमाणात प्रतिसाद मिळत आहे. सवलत जाहीर होताच थकबाकीदार नागरिक मोठ्या संख्येने ग्रामपंचायत कार्यालयात हजेरी लावत असून, दिवसभर कार्यालयात गर्दीचे वातावरण पाहायला मिळत आहे.
या सवलत योजनेमुळे अनेक वर्षांपासून प्रलंबित असलेली थकीत घरपट्टी व पाणीपट्टीची थकबाकी नागरिक स्वच्छेने भरत आहेत. परिणामी ग्रामपंचायतीच्या महसूल वसुलीत लक्षणीय वाढ होत असून ग्रामपंचायतीच्या आर्थिक स्थैर्यास चालना मिळत आहे. ग्रामस्थांनी दाखवलेली ही जबाबदारीची भावना ग्रामविकासाच्या दृष्टीने सकारात्मक ठरत आहे.
ही सवलत ३१ डिसेंबर २०२५ पर्यंत लागू असून, अद्याप थकबाकी असलेल्या सर्व मिळकतधारक व नागरिकांनी दिलेल्या मुदतीत थकबाकी भरून या सवलतीचा लाभ घ्यावा, असे आवाहन सरपंच जनार्दन चंद्रभान घोगरे पा. व ग्रामपंचायत लोणी खुर्द यांच्या वतीने करण्यात आली आहे.
सरपंच जनार्दन घोगरे पा. यांनी दिलेल्या या लोकहितकारी सवलतीमुळे ग्रामस्थांमध्ये समाधानाचे वातावरण निर्माण झाले असून, ग्रामस्थांनी या निर्णयाबद्दल समाधान व्यक्त करत त्यांचे आभार मानले आहेत. तसेच सरपंच, उपसरपंच, सर्व ग्रामपंचायत सदस्य व कर्मचारीवृंद यांनी नागरिकांनी दिलेल्या सकारात्मक प्रतिसादाबद्दल समाधान व्यक्त केले आहे.
ग्रामपंचायतीच्या विविध विकासकामांसाठी महसूल वेळेत जमा होणे आवश्यक असून, ग्रामस्थांनी यापुढेही असेच सहकार्य केल्यास लोणी खुर्द गावाचा सर्वांगीण विकास अधिक गतीने साध्य होईल, असा विश्वास व्यक्त करण्यात आला आहे. या उपक्रमामुळे लोणी खुर्द ग्रामपंचायतीची आर्थिक शिस्त अधिक भक्कम होत असून, पारदर्शक कारभार व लोकसहभागातून राबविण्यात येणारा हा उपक्रम इतर ग्रामपंचायतींसाठीही प्रेरणादायी ठरत आहे.
