शिर्डीतील सचिन गिधे या तरुणाची मोक्क्यातील गुंड दीपक पोकळे याने जिवंत जाळून क्रूर व भीषण हत्या केली. या पोकळेच्या गुंडगिरीबद्दल मराठवाड्यातील भाजपाचे नेते आमदार सुरेशजी धस यांना निवेदन देवुन यात आपण लक्ष घालावे अशी मागणी भाजपाचे नेते डॉ.राजेंद्र पिपाडा यांच्या निवासस्थानी आमदार सुरेश धस यांनी भेट दिली त्यावेळेस निवेदन देवुन केली. यावेळी प्रगतशील शेतकरी शिवाजी आनप, मदनलालजी पिपाडा,नरेंद्रजी पिपाडा,महावीरजी पिपाडा,निखील पिपाडा,योगेश मुनावत,चेतन पिपाडा,रामदास येवले आदी यावेळी उपस्थित होते.
दिलेल्या निवेदनात पुढे म्हटले आहे की, मोक्क्यातील आरोपी दीपक पोकळे हा सराईत गुन्हेगार आहे. गेल्या 15 वर्षापासून राहाता,शिर्डी,कोपरगाव,संगमनेर या तालुक्यात दहशत करतो. राहात्यामध्ये दिनेश भडांगे नावाचा एक गरीब मुलगा चहाचा व्यवसाय करत होता. पोकळे त्याचा गल्ला लुटायला गेला त्याने विरोध केला तर त्याचे मुंडके तोडून 2014 साली त्याचा खुन केला. राहाता पो.स्टे. गु.र.नं. 31/2014 भादवि कलम 302 दाखल आहे. साकुरीतील एका हॉटेलमध्ये जेवनाचे बील मागीतले म्हणुन त्याने त्याठिकाणी गोळीबार केला होता. त्याचा राहाता पो.स्टे.येथे 2017 आर्म अँक्ट कलम 4/25 सह.महाराष्ट्र संघटित गुन्हेगारी अधि.सन 1999 चे कलम3(1) प्रमाणे गुन्हा दाखल आहे. रेशनचे धान्य वाहतूक व्यवसाय करणारे विजय बोबडे यांना रिव्हॉल्वहर लावून त्यांच्याकडून 10 लाख रुपये लुटले. त्याचा राहाता पो.स्टे.मध्ये गु.र.नं.220/2023 भादवि कलम 395,341,385,384,आर्म अँक्ट कलम 4/25 प्रमाणे गुन्हा दाखल आहे. दि.13/09/2025 रोजी त्याने संगमनेर तालुक्याताल अनिल आहेर यांच्यावर जीवे मारण्याच्या उद्देशाने धारदार शस्त्राने वार केला. संगमनेर तालुका पो.स्टे.येथे गु.रं.नं. 56/2025 गुन्हा दाखल आहे. या गुन्ह्यात अद्याप पर्यंत त्याला अटक केलेली नाही. 4 महिन्यापुर्वीच्या या खुनी हल्ल्यामध्ये पोलिसांनी दीपक पोकळेला जर अटक केली असती तर शिर्डीतील सचिन गिधे या तरुणाचे प्राण वाचले असते.
10 डिसेंबर रोजी शिर्डी येथुन आरोपी दीपक पोकळे याने सचिन गिधे या तरुणाचे अपहरण करून टायर व डिजेलच्या सहाय्याने जाळून टाकले. पोकळे या गुंडाने आता पर्यंत हजारो साईभक्तांच्या गाड्या लुटल्या परंतु त्यापैकी ठरावीकच गुन्हे लुटल्याचे दाखल आहेत. त्याचे विरुद्ध मोक्का,खुन,खुनाचा प्रयत्न,दरोडा,जबरी चोरी,गाड्या लुटणे,घरफोड्या करणे,हप्ते गोळा करणे,अवैध वाळू उपसा करणे असे गुन्हे दाखल आहेत.फिर्यादीला जीवे मारण्याच्या धमक्या देवुन तो फिर्यादीही मागे घ्यायला लावतो अशी त्याची गुंडगिरीची पद्धत आहे. संगमनेर तालुक्यात 4 महिन्यापूर्वी जो त्याचे खुनी हल्ला केला त्यात त्याला पोलिसांनी वेळीच अटक केली असती तर शिर्डीतील तरुणाची निर्घृणपणे जी हत्या केली हा प्रकार टळला असता.
शिर्डी मतदार संघातील राजकीय नेत्यांनी दीपक पोकळे याला पाठबळ दिले त्यामुळे त्याने आपले कोणीच काही वाकडे करू शकत नाहीत. मोठी राजकीय शक्ती आपल्या बरोबर आहे असे त्याला वाटत असल्याने त्याचे धाडस वाढले व त्यातून त्याने अपहरण करून अत्यंत निर्दयीपणे डिजेलच्या सहाय्याने जाळून टाकून खून केला त्यामुळे शिर्डी मतदारसंघामधील सर्वसामान्य जनतेमध्ये प्रचंड संतापाची भावना आहे.
तरी राहाता–शिर्डी परिसर हादरवून टाकणार्या अपहरण व हत्याकांडाचा अखेर पर्दाफाश झाला असून सचिन कल्याणराव गिधे याचा निर्घृण खून करण्यात आल्याचे उघडकीस आले आहे. या प्रकरणातील दहशत निर्माण करणारा सराईत गुन्हेगार दीपक अंबादास पोकळे याला कठोर शिक्षा करून मृत झालेल्या तरुणाच्या कुटुंबाला न्याय द्यावा ही विनंती.
