राहात्यात इंधनासाठी झुंबड; काही पेट्रोल पंप बंद अफवांमुळे नागरिकांची धावपळ
राहाता शहरात पेट्रोल आणि डिझेलच्या तुटवड्याच्या अफवांमुळे नागरिकांमध्ये एकच गोंधळ उडाला असून अनेक पेट्रोल पंपांवर वाहनांच्या लांबलचक रांगा पाहायला मिळाल्या.
अचानक वाढलेल्या गर्दीमुळे काही ठिकाणी तात्पुरते पंप बंद ठेवण्याची वेळही प्रशासनावर आली. शहरातील प्रमुख मार्गांवर वाहतूक कोंडीसारखी परिस्थिती निर्माण झाली होती.
सकाळपासूनच इंधन संपणार या अफवांनी जोर पकडताच नागरिकांनी मोठ्या प्रमाणावर पंपांकडे धाव घेतली. दोनचाकी, चारचाकी वाहनांची गर्दी इतकी वाढली की काही ठिकाणी शिस्त राखणे कठीण झाले. परिणामी काही पेट्रोल पंप चालकांनी सुरक्षिततेच्या कारणास्तव सेवा थांबवण्याचा निर्णय घेतला.
दरम्यान, पेट्रोल-डिझेल असोसिएशनचे जिल्हाध्यक्ष स्वाधीन गाडेकर यांनी नागरिकांना स्पष्ट शब्दांत आवाहन केले की, अफवांवर विश्वास ठेवू नका. राहाता शहरात पेट्रोल आणि डिझेलचा पुरवठा पूर्णपणे सुरळीत सुरू आहे. नागरिकांनी विनाकारण गर्दी करू नये आणि शांतता राखावी.
या घटनेमुळे एक गोष्ट पुन्हा अधोरेखित झाली आहे की, सोशल मीडियावर पसरलेल्या अपूर्ण किंवा चुकीच्या माहितीमुळे सामान्य जनतेमध्ये भीतीचे वातावरण निर्माण होते. प्रशासनानेही नागरिकांना संयम राखण्याचे आणि अधिकृत माहितीवरच विश्वास ठेवण्याचे आवाहन केले आहे.
