श्री साईबाबा संस्थानला देणगी स्वरूपात अत्याधुनिक रुग्णवाहिका प्राप्त
शिर्डी :
श्री साईबाबा संस्थान ट्रस्ट संचलित रुग्णालयासाठी आंध्र प्रदेश येथील साईभक्त श्री. रवि कुमार व सौ. सुप्रिया यांच्याकडून FORCE कंपनीची अत्याधुनिक Tempo Traveller TI Ambulance देणगी स्वरूपात प्राप्त झाली आहे.
या नवीन रुग्णवाहिकेची संस्थानचे मुख्य कार्यकारी अधिकारी श्री. गोरक्ष गाडीलकर यांच्या हस्ते विधीवत पूजा करून सेवेत दाखल करण्यात आली. यावेळी संस्थानचे प्रशासकीय अधिकारी श्री. अतुल वाघ यांच्यासह अधिकारी व कर्मचारी उपस्थित होते.
सुमारे २० लाख १३ हजार ४९९ रुपये किंमतीची ही रुग्णवाहिका संस्थानच्या आरोग्यसेवेसाठी उपयुक्त ठरणार आहे. संस्थानच्या रुग्णालयात दररोज मोठ्या संख्येने रुग्ण उपचारासाठी येत असतात. त्यांच्या तातडीच्या वैद्यकीय सेवेसाठी ही देणगी विशेष उपयोगी ठरणार आहे.
