नेवासा तालुक्यातील पवित्र श्री क्षेत्र देवगड येथील महंत भास्करगिरीजी महाराज यांच्या मातोश्रींच्या निधनाने संपूर्ण परिसरात शोककळा पसरली आहे. या दुःखद प्रसंगी राहाता नगरपालिकेच्या प्रथम लोकनियुक्त नगराध्यक्षा सौ. ममता पिपाडा व भाजपाचे नेते डॉ. राजेंद्र पिपाडा यांनी श्री क्षेत्र देवगड येथे भेट देऊन महंत भास्करगिरीजी महाराज यांची सांत्वनपर भेट घेवुन आपल्या संवेदना व्यक्त केल्या.
यावेळी पिपाडा दाम्पत्यांनी महाराजांशी संवाद साधत त्यांच्या दुःखात सहभागी होत श्रद्धांजली अर्पण केली. तसेच, देवगड परिसराच्या विकासासाठी झालेल्या विविध कामांच्या आठवणींनाही उजाळा देण्यात आला. विशेषतः देवगड येथील पाणी योजनेच्या संदर्भात महत्त्वपूर्ण पाठपुरावा करून त्या काळातील राज्याचे गृहमंत्री स्व. आर. आर. पाटील यांना प्रत्यक्ष स्थळी आणून सदर पाणी योजनेला मंजुरी मिळवून दिल्याची आठवण महंत भास्करगिरीजी महाराज यांनी कृतज्ञतेने व्यक्त केली.
डॉ. राजेंद्र पिपाडा यांच्या सातत्यपूर्ण प्रयत्नांमुळे देवगडसारख्या धार्मिक व ग्रामीण भागात मूलभूत सुविधांच्या उभारणीस गती मिळाली असल्याचेही यावेळी महंतांनी चर्चेदरम्यान अधोरेखित केले. महंत भास्करगिरीजी महाराज यांच्या मातोश्रींच्या आत्म्यास शांती लाभावी, अशी प्रार्थना यावेळी करण्यात आली.
